Ármann Kr. Ólafsson bæjarstjóri Kópavogs og Willum Þór Þórsson heilbrigðisráðherra hafa undirritað viljayfirlýsingu um byggingu hjúkrunarheimilis í Kópavogi fyrir 120 íbúa. Stefnt er að því að framkvæmdir geti hafist á næsta ári og að heimilið verið tilbúið til notkunar árið 2026.
Enn eitt skref í þá átt að bæta aðstæður aldraðra
„Það er einkar ánægjulegt að skrifa undir þessa viljayfirlýsingu. Með þessu fjölgar hjúkrunarrýmum í bæjarfélaginu og við stígum enn eitt skref í þá átt að bæta aðstæður aldraðra sem ekki eru færir um að búa lengur á eigin heimili“ segir heilbrigðisráðherra.
Gert er ráð fyrir að nýja heimilið leysi af hólmi hjúkrunarheimilið Sunnuhlíð þar sem fyrir eru 70 hjúkrunarrými, þar af 17 tvíbýli. Með nýja heimilinu fjölgar hjúkrunarrýmum í Kópavogi um 50 og öll aðstaða íbúa verður í samræmi við nútímakröfur um húsnæði og aðbúnað.
85% af kostnaðinum greiddur af ríkissjóði
Áformað er að heimilið rísi á lóð Kópavogsbæjar við Kópavogsbraut. Kostnaður við framkvæmdir mun skiptast þannig að 85% greiðast úr ríkissjóði en Kópavogsbær greiðir 15%.