Það voru áhugaverðir tónleikar í Hörpu í byrjun mánaðarins þegar lög eftir ung tónskáld voru flutt á uppskerutónleikum Upptaktsins, tónsköpunarverðlaunum barna og ungmenna. Í Upptaktinum gefst nemendum í 5. – 10. bekk grunnskóla tækifæri til að senda inn lög og keppa um að komast í tónsmiðju þar sem verkin eru fullunnin af tónskáldum og síðan flutt af atvinnuhljóðfæraleikurum. Tónleikarnir eru hluti af
Barnamenningarhátíð og Kópavogur átti tvo fulltrúa í tónsmiðjunni þetta árið, þau Elvar Sindra Guðmundsson og Ernu Maríu Helgadóttur. Þau eru bæði í Salaskóla og stunda tónlistarnám í Skólahljómsveit Kópavogs. Elvar Sindri komst með lag í Upptaktinn á síðasta ári og ákvað að senda lag aftur í ár og komst aftur inn. Honum fannst tónlistarupplifunin vera það skemmtilegasta við Upptaktinn og það að vinna með hæfileikaríku fólki að því að fullvinna lagið og fá það svo flutt á tónleikum í Hörpu. Lagið hans „Á krossgötum“ var undir áhrifum íslenskrar þjóðlagatónlistar og bar sterkan keim af álfum og huldufólki.
Erna María átti lagið „Sólblómið“ á tónleikunum og hún samdi það til að sýna þær tilfinningar sem fylgdu því að fá einhverfugreiningu. Lagið er mjög hugljúft og í samvinnu við tónskáldið sitt útsetti hún það fyrir klarínettueinleik með strengjakvartett og í þeirri vinnu breyttist lagið talsvert og fleiri tilfinningar bættust við.
Þau eru sammála um það að það hafi verið mjög skemmtilegt og gefandi að fylgjast með þróun lags frá frumhugmynd í fullmótað tónverk sem síðan var spilað af atvinnuhljóðfæraleikurum. Við hin látum okkur nægja að fylgjast með þessum ungu tónskáldum og hlökkum til að heyra frá þeim í framtíðinni.
Myndirnar tók Anna Fjóla Gísladóttir sem eru af Elvari Sindra og Ernu Maríu. Hópmyndin er af öllum ungu tónskáldunum.
