Bæjarfulltrúar fengu leiðsögn um fjölnota íþróttahúsið í Vetrarmýri
Framkvæmdir ÍAV við fjölnota íþróttahús og tilheyrandi stoðrými eru í fullum gangi í Vetrarmýrinni. Verkið gengur vel og er uppsetningu á stálrömmum fyrir húsið lokið og stefnt var að því að klára uppsteypu um miðjan mars, en verklok eru áætluð í árslok.
Á dögunum fengu bæjarfulltrúar Garðabæjar, sviðsstjórar á vegum bæjarins og fleiri starfsmenn tengdir verkefninu leiðsögn um fjölnota íþróttahúsið af forsvarsmönnum ÍAV, en í húsinu verður rými fyrir knattspyrnuvöll í fullri stærð, auk upphitunaraðstöðu og tilheyrandi stoðrýma. Stærð íþróttasalarins verður um 80 x 120 metrar og flatarmál hússins alls verður um 18.200 fermetrar. Grundun hússins er á staurum og telja þeir 437 staura sem voru að meðaltali 9 metra langir, lengsti var 15 metrar.
