Jónsmessugleði Grósku var sett í tólfta sinn fimmtudaginn 24. júní með þemanu „leiktjöld litanna“. Litrík listaverk voru til sýnis við Strandstíginn í Sjálandshverfi Garðabæjar og að þessu sinni stóð sjálf myndlistarsýningin yfir fram til sunnudagsins 27. júní kl. 18.
Auk sýningarinnar voru alls konar listviðburðir á dagskrá bæði á austursvæði Strandstígsins og vestursvæði þar sem ungir listamenn í skapandi sumarstörfum Garðabæjar réðu ríkjum. Kvöldinu lauk með því að listamenn í Grósku og gestalistamenn frá Kópavogi, Reykjavík, Vestmannaeyjum og Rangárþingi ytra frömdu gjörninginn Myndun og mynduðu listaverk úr sjálfum sér.
Gróska, félag myndlistarmanna í Garðabæ, hefur staðið fyrir Jónsmessugleði í samstarfi við Garðabæ á hverju ári síðan 2009 nema hvað aflýsa þurfti gleðinni í fyrra vegna fjöldatakmarkana. Nú lögðu margir leið sína á Strandstíginn aftur og skörtuðu litríkum klæðum og höttum. Auðfundið var að Garðbæingar fögnuðu því að endurheimta Jónsmessugleði Grósku. Kvöldið einkenndist af kraftmikilli listrænni sköpun, ljúflyndum léttleika og fögnuði yfir því að hitta aftur góða vini, kunningja og annað fólk eftir einangrun og aðskilnað á ári faraldursins.
Gróska þakkar öllum sem tóku þátt í að gefa, gleðja og njóta á Jónsmessugleði 2021, gestum jafnt sem mælendum, sýnendum og öðrum listamönnum sem komu fram með hugvekjum og ljóðlist, dansi og leiklist, söng, tónlist og gjörningum.
https://www.facebook.com/groska210/
https://www.instagram.com/groskamyndlist/
Ljósmyndir tók Nanna Guðrún
