Kolbrún Þöll Þorradóttir er Íþróttakona Garðabæjar árið 2021 og Helgi Laxdal Aðalgeirsson er Íþróttakarl Garðabæjar fyrir árið 2021, en þau stunda bæði fimleika með Stjörnunni. Þetta varð ljóst í gær en þá fór fram kjör á íþróttamanni ársins í Garðabæ, sem var lýst í beinni streymisútsendingu á vef Garðabæjar frá Sveinatungu.
Á sama tíma var einnig tilkynnt um val á „liði ársins“ og „þjálfurum ársins“ auk heiðursviðurkenninga vegna starfa að íþrótta- og æskulýðsmálum.
Vegna fjöldatakmarkana var ekki haldin stór samkoma til að heiðra þá sem unnið hafa til afreka á árinu 2021 eins og gert hefur verið undanfarin ár. Þau sem hlutu viðurkenningar fyrir framúrskarandi árangur, þátttöku með landsliðum eða verðlaun á erlendum vettvangi höfðu þegar verið kölluð til og fengið sínar viðurkenningar afhentar.
Eins og undanfarin ár mun Garðapósturinn í samstarfi við Garðabæ vera með veglega umfjöllun um hátíðina í blaðinu í næstu viku, þann 19. janúar. Þar verða birta myndir og nöfn allra þeirra sem fengu viðurkenningu á hátíðinni.
