Uppskrift vikunnar er í boði sérvöruverslunin Me&MU á Garðatorgi, en í versluninni er hægt að fá margar sérvaldar spennandi matvörur beint úr héraði, bæði hérlendis og erlendis frá. Þetta eru allt vörur frá smáframleiðendum sem leggja áherslu á gæði í hráefni og að baki framleiðslunnar liggur jafnan handverk.
Langflestar matvörurnar sem er í uppskriftum Me&Mu í Garðapóstinum fást í versluninni á Garðatorgi.
Eigendur Me&Mu er þær Anna Júlíusdóttir og Sveinbjörg Jónsdóttir, en að þessu sinni bjóða þær upp á girnilegt Lambakoftas og rauðkálssalat.
Lambakoftas
500 g lambahakk
1 lítill laukur, saxaður smátt
2 msk. kóríander, saxað smátt
2 msk. steinselja, söxuð smátt
2 tsk. kummin
1 tsk. paprika
1 tsk. kanill
½ tsk. chili-duft
¼ tsk. sjávarsalt
8 löng grillspjót, lögð í bleyti í 30 mín. ef notuð eru tréspjót
1 msk. ólífuolía
flatbrauð eða pítubrauð, til að bera fram með
hummus, til að bera fram með
½ sítróna, skorin í báta
¼ hnefafylli myntulauf
1 uppskrift rauðkálshrásalat
Rauðkálshrásalat
150 g majónes
50 g jógúrt
2 tsk. sítrónusafi
1 tsk. sítrónubörkur, rifinn fínt
1 hvítlauksgeiri, saxaður smátt
200 g rauðkál, kjarnhreinsað og skorið mjög þunnt
1 gulrót, afhýdd og rifin niður
1 msk. steinselja
Leiðbeiningar Lambakoftas
1 Setjið lambahakk í stóra skál ásamt lauk, kóríander, steinselju, kummin, papriku, kanil, chili-dufti og salti.
2 Blandið öllu vel saman, hér er best að nota hendurnar. Skiptið hakkinu yfir í átta jafna hluta, bleytið hendurnar örlítið og mótið kúlur úr hakkinu. Mótið kúlurnar í u.þ.b. 10 cm langar lengjur.
3 Stingið grillspjóti inn í miðjuna á hverri lengju, leggið á bakka og kælið í 1 klst. Hér er einnig hægt að kæla kjötið í allt að einn sólahring áður en það er eldað. Takið kjötið út 30 mín. áður en það er eldað.
4 Hitið grill eða grillpönnu og hafið á háum hita.
5 Penslið ólífuolíu yfir kjötið og eldið í u.þ.b 8 mín. Snúið kjötinu við á 2 mín. fresti
6 Berið fram með flatbrauði eða pítubrauði, hummus, sítrónubátum, myntulaufum og rauðkálshrásalati.
Rauðkálshrásalat
7 Setjið majónes, jógúrt, sítrónusafa, sítrónubörk og hvítlauk í blandara og maukið þar til allt hefur samlagast vel.
8 Setjið rauðkál, gulrót og steinselju í skál og blandið saman.
9 Hrærið sósunni saman við og kælið þar til fyrir notkun.
