Framundan eru hátíðarhöld sem fara fram á nokkrum stöðum í Garðabæ en fjölskyldan ætti öll að finna hátíðlega og skemmtilega viðburði við hæfi.
Gunnar Valur Gíslason, formaður menningar- og safnanefndar var spurður út í helstu liði dagskrárinnar sem annað árið í röð verður með óvenjulegu sniði. „Það er auðvitað ánægjulegt að nú sér fyrir endann á heimsfaraldrinum og líf okkar hér á Íslandi fer að nálgast það að verða eðlilegt. Engu að síður lögðu sóttvarnaryfirvöld línuna varðandi hátíðarhöld á 17. júní og dagskráin hefur verið skipulögð með leiðbeiningar yfirvalda að leiðarljósi. Það sýndi sig í fyrra að fólk naut þess að fagna þjóðhátíðardeginum í faðmi sinnar fjölskyldu og nánustu vina og því eru viðburðir miðaðir að því að fjölskyldan geti notið í sameiningu, föndrað, dansað og siglt saman“ segir Gunnar Valur bjartsýnn í bragði (Mynd á forsíðu. Gunnar Valur Gíslason)
Hefðbundnir dagskrárliðir eins og ávarp fjallkonu og forseta bæjarstjórnar verða í rafrænu formi og sýnt á facebooksíðu Garðabæjar. Aðrir dagskrárliðir fara fram á söfnum bæjarins og á Garðatogi, á ströndinni í Sjálandi og á Króki í Garðaholti. Á Bókasafni Garðabæjar sem verður opið frá klukkan 12 – 17 en grímusmiðja fer fram frá kl. 13
„Það á vel við að bjóða fjölskyldunni að föndra saman grímur enda eru grímur okkur öllum hugleiknar eftir þennan skrítna vetur“ segir Gunnar Valur.
Dans, tónlist og hönnunarsmiðja á yfirbyggðum torgum
Á dagskrá á yfirbyggðum svæðum Garðatorgs verður til dæmis danspartý. Það sló í gegn á Barnamenningarhátíð og hafa sömu aðilar verið fengnir til að leiða alla fjölskylduna í dansi sem fer fram á Garðatorgi 7, fyrir framan bókasafnið og hefst dansinn klukkan 13. Strax að loknum dansi mun hljómsveitin Karma Brigade leika, ef sólin skín þá munu þau koma sér fyrir utandyra á Garðatorgi en annars undir glerhjúpi Garðatorgs. Á yfirbyggðu torginu við Bónus fer fram fánasmiðja þar sem hönnuður aðstoðar gesti en sú smiðja stendur yfir frá klukkan 14 og tilvalið fyrir alla fjölskylduna að fara á milli staða og njóta. Þá er Hönnunarsafn Íslands opið frá 12-17 en þar er stórskemmtileg og merk sýning á hönnun Kristínar Þorkelsdóttur en mjólkurfernur, vörumerki og peningaseðlar eru meðal gripa á sýningunni. Smiðjan í Hönnunarsafninu geymir svo stærðfræðiþrautaborð sem öll fjölskyldan hefur gaman af að skoða.
Krókur á Garðaholti og ströndin í Sjálandi
Burstabærinn Krókur á Garðaholti verður einnig opinn á 17. júní frá klukkan 12-17 en Rúna Tetzchner safnvörður tekur á móti gestum með fróðleiksmola og utandyra verður boðið upp á gamaldags leiki sem tvær ungar konur stjórna. Þetta er í raun mjög yfirgripsmikil dagskrá þó lágstemmd sé því við ströndina í Sjálandi verður Skátafélagið Vífill með kanósiglingar og þrautabraut en vegna sjávarfalla hefst dagskráin þar klukkan 11.
Tónlistaratriði hér og þar um bæinn
Blásarakvintett skipaður ungu fólki var fenginn til að auka á hátíðleikann og þau leika í Ásgarðslaug klukkan 12, klukkan 13 við ströndina í Sjálandi, klukkan 14 við burstabæinn Krók og klukkan 15 við Hönnunarsafn Íslands. Þá fara hjónin Jóhanna Guðrún og Davíð um bæinn og leika klukkan 11:30 í Sjálandinu við ströndina, klukkan 12:30 við Hönnunarsafnið og klukkan 15:30 fyrir gesti Álftaneslaugar.
Kvöldtónleikar með bassasöngvaranum Bjarna Thor
Rúsínan í pylsuendanum eru svo tónleikar bassasöngvarans og bæjarlistamanns Garðabæjar 2020, Bjarna Thors Kristinssonar. Bjarni Thor mun flytja íslensk sönglög í hinum frábæra sal Tónlistarskóla Garðabæjar en með honum leikur píanóleikarinn Ástríður Alda.
Við fögnum þessu sannarlega
Gunnar Valur segir að lokum: „Það er ákaflega mikilvægt fyrir okkur að fá loksins að hlýða á tónleika með Bjarna Thor en sökum samkomutakmarkanna var ekki unnt að halda slíka tónleika á meðan hann bara titil bæjarlistamanns. Bjarni Thor er í stuttu stoppi á landinu og við fögnum þessu sannarlega“.
Rétt er að benda á að allir dagskrárliðir, aðgangur í sundlaugar og söfn er ókeypis sem og tónleikar Bjarna Thors sem hefjast klukkan 20 í Tónlistarskóla Garðabæjar. Gestir þurfa að tryggja sér sæti á tónleikana á tix.is en miða má panta undir tónlist á tix.is.