Föstudaginn 8. október hefur Sunna Örlygsdóttir fatahönnuður og meistara útsaumari vinnustofudvöl sína í Hönnunarsafni Íslands.
Sunna stundaði nám í útsaumi við Skals Håndarbejdsskole í Danmörku áður en hún hóf BA nám í fatahönnun við Listaháskóla Íslands. Árið 2016 útskrifaðist hún með MA í fatahönnun frá ArtEZ Fashion Masters í Arnhem í Hollandi. Sunna hefur óendanlegan áhuga á fatnaði og öllu sem viðkemur fatagerð. Það sem vekur sérstakan áhuga hennar er: allt sem er skrítið og úr takti, lúxus og íburðarmikil efni, tímafrekt handverk og aðferðir, óhefðbundnir hlutir og tíska sem mótast af útsjónasemi. Sunna verður með sýningu á Hönnunarsafni Íslands í vetur en sýningin verður opnuð klukkan 16 þann 8. október.
Sunna mun einnig halda námskeið sem nefnist „Fríhendis flóra“ og hefst fimmtudaginn 14. október kl. 17 – 19. Námskeiðið fer fram þrjá fimmtudaga í röð og kostar 12.500 kr. Hægt verður að bóka námskeiðið á www.tix.is frá og með 4. október.
Forsíðumynd: Sunna Örlygs fatahönnuður Mynd: Rut Sigurðardóttir