Þeir voru virkilega vel heppnaðir tónleikarnir sem Skólahljómsveit Kópavogs stóð fyrir í Háskólabíói í byrjun nóvember. Þétt setinn bekkur áhorfenda tók vel á móti ungum hljóðfæraleikurum sem sýndu afrakstur vinnu sinnar frá því í haust og spiluðu fjölbreytta og krefjandi tónlist frá hinum ýmsu heimshornum. Það hefur ekki verið mikið um tónleikahald hjá Skólahljómsveitinni frekar en öðru tónlistarfólki síðustu mánuði og því var mikil eftirvænting ríkjandi þegar fyrsta hljómsveitin af þremur kom á svið og lék tónlistina sína af mikilli innlifun. Áhorfendur höfðu á orði að magnað væri að heyra hvað yngstu hljóðfæraleikararnir gátu spilað fallega og samtaka. Næsti hópur með aðeins eldri krökkum tók síðan við og spilaði bæði polka og marsatónlist með miklum tilþrifum og komu fram eins og þaulvanir atvinnumenn. Eftir hlé kom elsti hópurinn á svið og var alveg magnað að sjá allan þennan fjölda hljóðfæraleikara á sviðinu, varla fermetri af lausu plássi eftir á sviðinu þegar fyrsta tónverkið þeirra hljómaði um salinn. Efnisskráin var mjög metnaðarfull, með stórum hljómsveitarverkum og jafnframt mörgum einleikstækifærum fyrir unga og efnilega hljóðfæraleikara úr hópi nemenda sem allir stóðu sig með stakri prýði.
