Á morgun, miðvikudaginn 11. janúar verður borin í hús dagskrárbæklingur Menningar í Garðabæ en jafnframt verður hægt að nálgast eintök í þjónustuveri Garðabæjar, á Bókasafni Garðabæjar og Hönnunarsafni Íslands.
,,Í bæklingnum er gott yfirlit yfir viðburði sem í boði eru í menningarstofnunum bæjarins svo sem dagskrá fyrir börn og fjölskyldur í Hönnunarsafninu, bókasöfnum Garðabæjar og á sýningunni Aftur til Hofsstaða sem opnuð verður á Garðatorgi 7 á Safnanótt. Einnig má í dagskránni sjá úrval viðburða fyrir fullorðna svo sem hádegistónleikaröðina Tónlistarnæring sem fer fram í sal Tónlistarskóla Garðabæjar, fyrirlestra á Hönnunarsafni og fjölbreytt erindi á Bókasafni Garðabæjar,“ segir Ólöf Breiðfjörð menningarfulltrúi Garðabæjar.
Á vorönn fer einnig fram Safnanótt, Barnamenningarhátíð og Jazzhátíð Garðabæjar. ,,Það er því óhætt að lofa Garðbæingum og þeirra gestum lífi og fjöri enda dagskrá vorsins mjög fjölbreytt,“ segir hún.