Heilsugæslan Garðabæ flytur tímabundið í tímabundna aðstöðu á meðan húsnæði stöðvarinnar við Garðatorg verður þrifið og endurnýjað. Eldur kom upp í aðliggjandi húsnæði á Garðatorgi fyrir helgi og varð talsvert tjón á stöðinni af völdum reyks sem barst um bygginguna.
Starfsfólk Heilsugæslunnar Garðabæ hefur fengið tímabundna aðstöðu til að taka á móti skjólstæðingum sem eiga bókaða tíma á nærliggjandi heilsugæslustöðvum í Hafnarfirði og Kópavogi. Haft verður samband við þau sem eiga bókaða tíma og upplýst um hvar verður tekið á móti viðkomandi.
Fólki með bráð erindi er bent á að hringja í síma 1700 eða hafa samband í gegnum netspjall Heilsuveru. Starfsfólk Upplýsingamiðstöðvar Heilsugæslu höfuðborgarsvæðisins mun veita ráðgjöf og koma erindum á nærliggjandi stöðvar.
Mun flytja tímabundið í Þönglabakka 1
Unnið er að því að koma upp tímabundinni aðstöðu fyrir alla starfsemi Heilsugæslunnar Garðabæ á einum stað á meðan viðgerðir á Garðatorgi standa yfir. Á næstu dögum mun stöðin opna í húsnæði Heilsugæslu höfuðborgarsvæðisins við Þönglabakka 1 í Mjóddinni.
Óvíst er á þessu stigi hversu lengi stöðin á Garðatorgi verður lokuð en umtalsvert tjón varð á fasteigninni, húsgögnum, tölvubúnaði og lækningatækjum sem þar voru. Ljóst er að vinna við þrif og endurnýjun mun taka einhverjar vikur að lágmarki.
