Í tilefni af upphafi 16 daga átaks gegn kynbundnu ofbeldi sem hefst 25. nóvember mun Brynhildur Björnsdóttir, höfundur bókarinnar Venjulegar konur – vændi á Íslandi segja frá bókinni og rannsóknum sínum við gerð hennar þann 23. nóvember. Erindið fer fram á 1. hæð aðalsafns Bókasafns Kópavogs og hefst kl. 12:15.
Vændi hefur hingað til ekki farið hátt í umræðunni enda hefur því alltaf fylgt skömm og launung. Brotþolar vændis glíma við flóknar og alvarlegar afleiðingar vændisins, skelfilegar minningar og lífsreynslu sem erfitt getur reynst að lifa með. Vændiskaup eru ólögleg hérlendis og teljast kynferðisbrot samkvæmt íslenskum lögum. Samkvæmt lögreglunni og brotaþolum vændis er eftirspurnin eftir vændi þó gríðarleg hér á landi. Það er því mikilvægt að tala opinskátt um vændi, bæði á samfélagslegum grundvelli og ekki síður hvernig má koma til móts við brotaþola vændis af skilningi og mannúð.
Menning á miðvikudögum er styrkt af lista- og menningarráði Kópavogsbæjar.