„Það er frábært að fá að taka á móti öllum þessum glöðu og þakklátu börnum aftur“ segir menningarfulltrúi Garðabæjar, Ólöf Breiðfjörð.
Menningar- og safnanefnd Garðabæjar hafði hug á að bjóða upp á metnaðarfulla dagskrá sem Ólöf hafði skipulagt og var hún spurð nánar út í málið: ,,Við urðum að hætta að taka á móti hópum í haust en í lok janúar tókum við aftur upp þráðinn og buðum 1. – 4. bekk að njóta jazztónleika í sal Tónlistarskóla Garðabæjar og alls komu 735 börn á tónleika með frábærum tónlistarmönnum. Nú í mars hafa svo leikskólabörn komið í tónleikhús með Dúó Stemmu, einnig í tónlistarskólanum en alls 425 börn hafa notið þess að hlusta á og taka þátt í stórskemmtilegri dagskrá.
Dagskráin framundan snýst svo að mörgu leiti um undirbúning á Barnamenningarhátíð en börn í 5. – 7. bekk hafa frá miðjum febrúar komið í Hönn-unarsafn Íslands í dagskrá sem snýst um sýninguna Deiglumór sem nú stendur yfir í safninu. Krakkarnir fá að kynnast leirlistasögunni í gegnum leiðsögn og spjall um sýninguna og fá að því loknu að taka þátt í leirsmiðju. Afraksturinn verður sýndur á Barnamenningarhátíð í Garðabæ dagana 19. – 24. apríl en þá munu yfir 500 leir-fuglar mynda sýningu.
Dagskrá Barnamenningarhátíðar verður kynnt þegar nær dregur og blaðamaður Garðapóstsins fylgist spenntur með.
