Kópavogsbúinn, Vignir Vatnar Stefánsson skákmaður úr Breiðabliki, sem er aðeins tvítugur, nældi í
sinn fyrsta Íslandsmeistaratitil eftir hreint magnaðan lokadag á Íslandsmótinu í skák að Ásvöllum í Hafnarfirði í síðustu viku, en mótið stóð yfir í 10 daga. Eftir harða keppni og sviptingasaman síðasta dag varð úr að þrír keppendur enduðu efstir og jafnir og þurftu að há aukakeppni um titilinn.
Vignir hafði betur í æsispennandi bráðabana gegn stórmeisturunum og margföldum Íslandsmeisturum Hannesi Hlífari Stefánssyni(13x Íslandsmeistari) og Guðmundi Kjartanssyni (3x Íslandsmeistari).
Vignir mætti Hannesi í lokaumferðinni og ljóst að sigurvegarinn í þeirri skák myndi hampa titlinum. Jafntefli hins vegar þýddi að Guðmundur Kjartansson gat læðst inn í lokakeppnina. Lokaniðurstaðan reyndist ótrúleg, þrír efstir með 8,5 vinning og stórmeistaraáfanga. Hilmir aðeins hálfum vinningi á eftir. Við tók aukakeppni um titilinn, tvöföld umferð allir við alla. Þar endaði Vignir Vatnar uppi sem sigurvegari og Íslandsmeistari í fyrsta sinn.
Fyrir þá sem ekki muna þá varð Vignir Vatnar stórmeistari í mars á þessu ári þegar hann vann loka skákina á opna Arandjelovacmót inu í Serbíu. Af því tilefni sagði Vignir Vatnar í viðtali við mbl.is að hann stefndi að því að verða Íslandsmeistari í maí og hefur hann nú náð því markmiði sínu. Vignir Vatnar er sextándi stórmeistari Íslands frá upphafi.
Mynd: Vignir fyrir miðju með Hannes á vinstri hönd og Guðmund á hægri hönd