Píanóleikarnir Davíð Þór Jónsson og Eyþór Gunnarsson koma fram á síðkvöldstónleikum í Salnum, fimmtudaginn 20. júní klukkan 21. Þeir Eyþór og Davíð Þór eru tvímælalaust í hópi fremstu tónlistarmanna þjóðarinnar en hafa örsjaldan komið fram tveir einir. Hér gefst fágætt tækifæri til að heyra þá leika af fingrum fram inn í björtustu nótt ársins.
Eyþór Gunnarsson er einn atkvæðamesti tónlistarmaður Íslands. Hann hefur átt langt og farsælt samstarf við ógrynni tónlistarmanna úr flestum geirum tónlistar og er margverðlaunaður fyrir hljómborðs- og píanóleik sinn. Eyþór hefur spilað inn á vel á annað hundruð íslenskar hljómplötur og hefur einnig átt samstarf við fjölmarga erlenda tónlistarmenn og spilað á tónleikum um allan heim.
Davíð Þór er meðal fjölhæfustu tónlistarmanna landsins, jafnvígur á píanóleik, spuna, tónsmíðar og hljómsveitarstjórn auk þess sem hann leikur á ógrynni hljóðfæra. Hann hefur leikið með flestum tónlistarmönnum landsins og spilað á tónlistarhátíðum um allan heim.
„Tvíleikur Eyþórs og Davíðs er oft lyginni líkastur. En hann er líka alltaf sannur. Farangurinn skilinn eftir frammi. Strípað músíkalitet slaghörpuleikaranna einu spjarirnar. Í hverju ætli þeir verði?“ (Pétur Grétarsson).