Enn eru laus pláss á sumarnámskeið Náttúrufræðistofu Kópavogs en stofan hefur um árabil boðið upp á sumarnámskeið í júní fyrir 10-12 ára krakka. Námskeiðið gengur út á að kynna krökkunum vísindaleg vinnubrögð með því að fara út í náttúruna og afla þar efniviðar sem svo er unnið úr á rannsóknastofu.
Verkefnin eru margvísleg en miða að því að nemendur læri að þekkja helstu dýr og plöntur sem vænta má að finnist í nærumhverfinu. Farið er út alla daga, hvernig sem viðrar og reynt að komast í sem fjölbreyttast umhverfi.
Leiðbeinendur eru starfsmenn Náttúrufræðistofunnar og meðan á námskeiðinu stendur er rannsóknaraðstaða stofunnar tekin undir þau verkefni sem námskeiðinu tengjast.
Takmarkaður fjöldi kemst að en hámarksfjöldi eru 10 börn.
Námskeið verður að þessu sinni haldið vikuna 21. – 25. júní og stendur yfir milli kl. 10.00 – 15.00 hvern dag. Nánari upplýsingar má finna á vef Náttúrufræðistofu Kópavogs.
