Bæjarstjórn Kópavogs hefur samþykkt að fest verði kaup á nýjum flygli frá Steinway & sons fyrir Salinn í Kópavogi. Víkingur Heiðar Ólafsson verður til ráðgjafar í vali á flyglinum og ef allt gengur vel er vonast til að hljóðfærið verði komið í hús í sumar.
Gengið hefur verið frá sölu á gamla flyglinum við Skálholtskirkju en þar hefur ekki verið flygill til þessa. Lokahnykkur í söfnun Skálholts fyrir kaupum á flygli eru glæsilegir söfnunartónleikar sem verða haldnir í Salnum laugardaginn 5.apríl.
Á tónleikunum mun Jón Bjarnason, organisti Skálholtskirkju, leika á flygilinn. Auk hans munu koma fram Skálholtkórinn, félagar úr Karlakór Selfoss. Sigríður Ósk Kristjánsdóttir mun syngja einsöng og Jóhann I. Stefánsson mun leika á trompet.
„Þetta eru merkileg tímamót í sögu Salarins. Gamli Steinway flygillinn var valinn af Peter Máté og Jónasi Ingimundarsyni og hefur reynst afar vel en endurnýjun er tímabær fyrir Salinn. Það er afar ánægjulegt að gamli flygillinn fari í Skálholt enda öflugt tónlistarlíf í Skálholti, “ segir Axel forstöðumaður Salarins.
Hægt er að kaupa miða á söfnunartónleika Skálholts á heimasíðu Salarins.