Rómantíkin svífur yfir vötnum á Valentínusardaginn á Bókasafni Kópavogs og er dagurinn haldinn hátíðlegur þann 14. febrúar á hverju ári. Þennan dag geta gestir safnsins komið og skrifað falleg kort til þeirra sem þeim þykir vænt um og munu kortin liggja frammi á öllum hæðum aðalsafns og einnig á Lindasafni. „Við ákváðum að gera okkur dagamun þennan dag og hafa eitthvað rómantískt og skemmtilegt í boði fyrir öll sem koma til okkar,“ segir Lísa Z. Valdimarsdóttir forstöðumaður Bókasafns Kópavogs.
Kl. 12:15 sama dag kemur Rósa Vestfjörð Guðmundsdóttir eigandi Ásútgáfunnar á aðalsafn og les upp úr Rauðu seríunni og spjallar um tilurð bókanna. „Rósa gaf úr Rauðu seríuna í 38 ár og er goðsögn ástarsagna á Íslandi ef svo má segja,“ segir Lísa. „Hún hefur verið með tryggan lesendahóp öll þessi ár og voru mörg mjög vonsvikin þegar Rauðaserían hætti að koma út á prenti í fyrra. Þetta voru því ákveðin tímamót sem okkur fannst gaman að geta farið yfir með Rósu“ bætir Lísa við. „Við hvetjum öll sem vilja fá smá rómantík á þessum degi að koma og hlusta á erindið og skrifa fallegt kort til vina og ættingja í leiðinni,“ segir Lísa að lokum.