Skapandi sumarstörf í Kópavogi vekja athygli á lista- og uppskeruhátíð sem haldin verður í Molanum og Gerðarsafni í Kópavogi á morgun, fimmtudaginn 22. júlí 2021. Dagskráin stendur frá kl. 17-20.
Starfið veitir ungu listafólki á aldrinum 18-25 ára tækifæri til að vinna að eigin listsköpun og hefur það reynst mikilvægur stökkpallur fyrir margt af efnilegasta listafólki landsins. Í sumar voru starfrækt 21 spennandi og ólík verkefni, og stóðu að baki þeim 34 listamenn úr mismunandi miðlum.
Á dagskránni má sjá silfursmíði og myndlistasýningar, hlusta á sjávarsinfóníu úr upptökum frá hvölum, útvarpsleikrit, tónlistargjörninga og margt fleira. Þetta eru flest verkefni sem starfað hafa innan Skapandi Sumarstarfa í Molanum frá upphafi og því stór og skemmtileg hátíð í vændum.
Á lokahátíðinni munu listamennirnir deila afrakstri sumarsins fyrir gesti og gangandi, áhugasama og forvitna sem langar að kynna sér það athyglisverðasta í íslensku grasrótinni. Þetta er í raun einstakur viðburður í miðbæ Kópavogs.
Verið hjartanlega velkomin á þessa kraumandi hátíð, við tökum vel á móti ykkur í Molanum, að Hábraut 2 í Kópavogi.
