Nýju listaverki eftir Sirru Sigrúnu Sigurðardóttur myndlistarmann var varpað á Kópavogskirkju 4. og 5. febrúar sl. í tilefni Vetrarhátíðar í Kópavogi.
Verk Sirru, sem var gert sérstaklega fyrir form Kópavogskirkju og í samtali við list Gerðar Helgadóttur, var gert að beiðni Kópavogsbæjar í tilefni Vetrarhátíðar. Hátíðin var að þessu sinni lágstemmd og voru ljósaverk og listaverk utandyra í forgrunni.
Sækir innblástur til verka Gerðar Helgadóttur
Verk Sirru eru kosmísk í eðli sínu og tengjast vangaveltum um stöðu okkar í gangverki náttúru, eðlisfræði og þeirra afla sem halda heiminum gangandi. Nýtt verk Sirru sækir innblástur í verk Gerðar Helgadóttur; vitnað er til lita og forma í gler- og mósaíkverkum Gerðar, en jafnframt til áhuga hennar á gangi himintungla, dulspeki og tengingu mannsins við alheiminn.
Vakið verðskuldaða athygli fyrir list sína
Sirra Sigrún lauk BA prófi frá Listaháskóla Íslands árið 2001 og útskrifaðist með meistaragráðu frá School of Visual Arts í New York 2013. Hún hefur haldið einkasýningar í Listasafni Reykjavíkur, Nýlistasafninu, Listasafni Árnesinga, Hafnarborg og Kling & Bang og tekið þátt í fjölda sýninga víða um heim, þar á meðal í Kína, Finnlandi, Bandaríkjunum og Bretlandi.
Sirra hefur vakið verðskuldaða athygli fyrir list sína og m.a. fengið styrki og viðurkenningar úr listasjóðum Svavars Guðnasonar, Guðmundu Andrésdóttur og verðlaun Guðmundu S. Kristinsdóttur. Sirra Sigrún var listamaður Kærleikskúlunnar 2021.
