Fimmtudaginn 27. apríl kl. 17:00 heldur Steinn Kárason, garðyrkjumeistari og M. Sc. í umhverfisfræðum erindi á aðalsafni Bókasafns Kópavogs um íslenskar drykkjar- og lækningajurtir. Steinn segir frá algengum jurtum, leiðbeinir um söfnun þeirra, verkun og notkun. Hann veitir einnig tilsögn í að útbúa jurtate, grasaseyði og hvannasúpu og veitir innsýn inn í þróun og sögu grasalækninga og nýjar rannsóknir sem styðja reynslu forfeðranna. Stiklað verður á stóru í sögulegu samhengi og áhersla lögð á sjálfbærni og virðingu við náttúruna.
Erindið fer fram í fjölnotasalnum á 1.hæð safnsins, aðgangur er ókeypis og öll velkomin á meðan húsrúm leyfir.
