Holl og næringarrík fæða
Ebba Guðný, heilsufyrirlesari og rithöfundur, fræðir foreldra um holla og næringarríka fæðu fyrir yngstu börnin á foreldramorgni þann 30. september kl. 10:00 á Bókasafni Kópavogs, aðalsafni. Foreldramorgnar eru í boði alla fimmtudaga og koma gestafyrirlesarar tvisvar í mánuði. Eru morgnarnir frábært tækifæri fyrir foreldra og ung börn þeirra til að hittast og eiga rólega og afslappaða stund saman á safninu.
Aðgangur er ókeypis og allir eru velkomnir.
Brum hljóðsmiðja
Hefur þig dreymt um að fara á hljóðveiðar í trjálundi eða skógi? Nú gefst til þess tækifæri. Laugardaginn 2. október kl. 13:00 – 15:30 býður Lindasafn upp á tónsmíðavinnustofu þar sem farið er á hljóðveiðar, grafísk skor gerð með vatnslitum og búin til hljóðfæri úr efnivið úr skóginum. Grafíska skorið er síðan leikið á þau.
Eru það Kara Hergils, Andrea Elín Vilhjálmsdóttir og Harpa Arnardóttir sem leiðbeina og eru allir velkomnir.
