Helga Hauksdóttir, varabæjarfulltrúi Framsóknarflokksins og formaður skipulagsráðs, gefur kost á sér í oddvitasætið í Framsókn í Kópavogi, en Birkir Jón Jónsson, oddviti Framsóknar í Kópavogi hefur sagt skilið við sveitarstjórnarmálin og gefur ekki kost á sér á lista framsóknar fyrir komandi sveitarstjórnarkosningar.
,,Ég gef kost á mér í oddvitasætið hjá Framsókn í Kópavogi. Á þessu kjörtímabili hef ég verið varabæjarfulltrúi, formaður skipulagsráðs, formaður svæðisskipulagsnefndar og stjórnarformaður Markaðsstofu Kópavogs þannig verkefnin hafa verið fjölbreytt og öll mjög spennandi. Mig langar til þess að leiða sterkan lista Framsóknar í Kópavogi til góðra verka næstu fjögur árin.
Ég hef búið í Kópavogi frá 8 ára aldri. Minn bakgrunnur er í lögfræði og ég hef unnið sem lögfræðingur, bæði hjá hinu opinbera sem og í einkageiranum. Ég er með embættispróf frá Háskóla Íslands, lögmannsréttindi og mun útskrifast með MBA gráðu frá Háskólanum í Reykjavík nú í vor.
Síðustu fjögur ár hef ég farið fyrir skipulagsmálum í Kópavogi, m.a. gerð nýs aðalskipulags, sem er grunnur að frekari uppbyggingu í Kópavogi, skipulagi miðbæjar Kópavogs og Glaðheima. Mín áherslumál auk skipulagsmála eru að skólar í Kópavogi séu í fremstu röð og góð þjónusta við barnafjölskyldur,“ segir í tilkynningu frá Helgu
