Heildarfjárhæð greiddrar leigu er hæst í póstnúmeri 203 í Kópavogi

Meðalleiguverð á höfuðborgarsvæðinu var hæst í póstnúmeri 203 í fyrra, en í því sama póstnúmeri voru íbúðir til leigu jafnframt stærri en annars staðar á höfuðborgarsvæðinu. Leiguverðið á hvern fermetra var hins vegar hæst í Vesturbænum. Þetta kemur fram í upplýsingum sem HMS hefur unnið upp úr nýrri leiguskrá og var gefin út í morgun.

Leiguskráin, sem er hluti af Húsnæðisgrunni HMS, geymir hún nú um 21.000 samninga og heldur utan um rafræna skráningu leigusamninga. Hún hefur það að markmiði að bæta upplýsingar um leigumarkaðinn, þróun leiguverðs og lengd leigusamninga og mun hún nýtast stjórnvöldum við stefnumótun í húsnæðismálum. 

Leiguverðið lægst í Kópavogi á hvern fermetra

Lesa má úr gögnum leiguskrár að meðalleiga á hvern fermetra á höfuðborgarsvæðinu er hæst í póstnúmeri 107 eða rúmlega 4.200 kr. og er fermetraverð þar 13-16% hærra en í póstnúmerum 101, 102 og 105 sem koma þar á eftir. Lægsta meðalfermetraverðið er í póstnúmerum 103 í Reykjavík og svo 201 og 203 í Kópavogi en í þessum þremur póstnúmerum er leiguverð undir 3.000 kr. á fermetra.

Heildarfjárhæð greiddrar leigu er hins vegar hæst í póstnúmeri 203, þar sem leigjendur greiða að meðaltali 293 þúsund krónur á mánuði. Til samanburðar er meðalleiga í póstnúmeri 107 207 þúsund krónur á mánuði. Í póstnúmeri 203 má einnig finna stærstu leiguíbúðirnar, en að meðaltali eru þær um 108 fermetrar, samanborið við 59 fermetra meðalstærð í póstnúmeri 107, líkt og sjá má á mynd hér að ofan.

Nýjustu greinarnar

Tengdar greinar