Blikinn Birna Kristín Kristjánsdóttir varð um sl. helgi Smáþjóðameistari í langstökki þegar hún setti mótsmet á Smáþjóðameistaramótinu á Gíbraltar með risa stökki upp á 6,46 m en stökkið er jafnframt Íslands- og aldurs-flokkamet í flokki 23 ára og yngri.
Gamla metið var frá 2012 og hljóðaði upp á 6,27 m sem þýðir að Birna Kristín bætti metið um heila 19 cm og er stökkið jafnframt næst lengsta stökk íslenskrar konu frá upphafi! „Mér leið ótrúlega vel og var mjög fersk á mótinu og það fór allt eins og það átti að fara. Ég var létt á mér og gerði öll stökkin gild svo þetta var bara stórkostlegt,“ sagði Birna þegar við heyrðum í henni hljóðið, alsæl með sigurinn og afrekið!
En þetta var ekki eina Blikagullið á Gíbraltar um sl. helgi því Júlía Kristín Jóhannesdóttir sigraði einnig 100 m grindahlaup kvenna á tímanum 14;36 sek. sem þýðir að Breiðablik eignaðist ekki einn Smáþjóðameistara í frjálsum heldur tvo! ,,Við erum að rifna úr stolti og sendum Birnu Kristínu, Júlíu og þjálfarateymi Breiðabliks innilegar hamingjuóskir,” segir Gréta Björg Jakobsdóttir sem situr í stjórn frjálsíþróttadeildar Breiðabliks.
Í næstu viku fara svo um 20 iðkendur úr frjálsíþróttadeild Breiðabliks á Gautaborgarleikana í Svíþjóð.
Forsíðumynd: Birna Kristín trúði vart sínum eigin augum þegar hún sá hversu langt stökkið var og mótsmetið fallið, en Birna stökk 6,46m