Bæjarstjórn Kópavogs samþykkti í dag með 11 atkvæðum beiðni Guðmundar Gísla Geirdal um lausn frá störfum bæjarstjórnar, og annarra trúnaðarstarfa fyrir bæjarstjórn Kópavogs, til loka kjörtímabilsins.
Guðmundur, sem er bæjarfulltrúi Sjálfstæðisflokksins í Kópavogi, ákvað einnig sl. mánudag að draga framboð sitt til baka úr prófkjöri flokksins fyrir komandi sveitarstjórnarkosningar, sem fer fram nk. laugardag. Hann hafði gefið kost á sér í þriðja sæti listans.
Samkvæmt heimildum fréttastofu Vísis hafa fleiri en einn kvenkyns bæjarfulltrúi gert athugasemd við hegðun Guðmundar. Í kjölfar uppákomu á viðburði sem bæjarfulltrúar og starfsmenn sóttu í nóvember barst kvörtun til Sjálfstæðisflokksins. Var málið tekið til skoðunar hjá flokknum og sett í hendur ráðgjafarstofunnar Attentus samkvæmt viðbragðsáætlun flokksins.
Guðmundur hefur í framhaldinu ákveðið að stíga til hliðar og fengið lausn frá störfum bæjarstjórnar og annarra trúnaðarstarfa fyrir Kópavogsbæ.
