Góð staðsetning á frábærum útsýnisstað -Opnað fyrir tilboð í lóðir í Vatnsendahvarfi

Opnað hefur verið fyrir tilboð í lóðir í öðrum áfanga í Vatnsendahvarfi. Í öðrum áfanga verður úthlutað lóðum fyrir einbýlishús, parhús, klasahús og fjölbýli. Hægt er að skila inn tilboðum í fjórar vikur, frá 23.janúar til 20.febrúar í gegnum útboðsvef Kópavogsbæjar, Tendsign.is

Áhersla lögð á  fjölbreytta byggð með góðum samgöngutengingum

„Við erum mjög spennt að fá nýtt hverfi í Kópavoginn og fundum það í fyrsta áfanga að það er mikill áhugi, enda góð staðsetning á frábærum útsýnisstað í nálægð við mikla náttúrufegurð. Hverfið verður ekki þétt byggt og gert ráð fyrir fallegum grænum svæðum sem flæðir vel í gegnum hverfið. Áhersla er lögð á  fjölbreytta byggð í Vatnsendahvarfi með góðum samgöngutengingum fyrir alla ferðamáta. Þá munu íbúar njóta góðs af þeirri þjónustu sem fyrir er í nærumhverfinu auk þess sem reistur verður leikskóli og grunnskóli fyrir 1. til 4. bekk í þessu nýja hverfi,“ segir Ásdís Kristjánsdóttir, bæjarstjóri Kópavogs.

Í Vatnsendahvarfi verða 500 íbúðir í fjölbýli og sérbýli og fellur byggðin vel að nágrenninu. Lögð er áhersla á sjálfbæra og umhverfisvæna byggð og góðar samgöngutengingar fyrir akandi, hjólandi og gangandi vegfarendur.

Stefnt er að því að lóðir í öðrum áfanga verði byggingarhæfar í september 2025.

Haldinn verður kynningarfundur 30.janúar fyrir þau sem þurfa nánari upplýsingar og aðstoð um Tendsign. Fundurinn verður haldinn í Bókasafni Kópavogs og stendur yfir frá 16.00 til 18.30.

Yfirlitsmyndir af Vatnsendahvarfi

Nýjustu greinarnar

Tengdar greinar