Framkvæmdir við jarðvinnu og lagnir í Vatnsendahvarfi eru hafnar. Til að halda upp á áfangann tók bæjarstjóri Kópavogs Ásdís Kristjánsdóttir fyrstu skóflustungu að götunni Hæðarhvarfi. Árni Geir Eyþórsson, framkvæmdastjóri Jarðvals sem sér um jarðvegsvinnu í Vatnsendahvarfi, var Ásdísi innan handar við skóflustunguna sem tekið var með beltisgröfu.
„Það er virkilega gaman að sjá að hér eru framkvæmdir komnar á fulla ferð, það ríkir mikil eftirvænting í Kópavogi eftir að fá nýtt hverfi í bæinn. Vatnsendahvarfið er vel staðsett á afar fallegum útsýnisstað,“ segir Ásdís Kristjánsdóttir bæjarstjóri Kópavogs.
Um er að ræða 1,1 milljarða framkvæmd sem felur í sér lagnir og jarðvinnu undir gatnagerð í Vatnsendahvarfi, nýju hverfi á Vatnsendahæð í Kópavogi. Uppbygging húsa og mannvirkja getur hafist þegar gatna- og lagnagerð er lokið en verkið er unnið í áföngum í samræmi við lóðaúthlutanir Kópavogsbæjar. Fyrsta úthlutun var í júní og var þá um að ræða fjölbýlishúsalóðir. Í næstu úthlutun verður einnig úthlutað lóðum fyrir raðhús, parhús og einbýli. Að jarðvinnu lokinni verður lokafrágangur gatna, svosem malbikun, gangstéttir og opin svæði boðin út.
Auk fulltrúa Kópavogbæjar voru viðstaddir skóflustunguna fulltrúar frá Ljósleiðaranum en Ljósleiðarinn, Veitur og Míla eru verkkaupar að 15% verksins en hlutur Kópavogsbæjar eru 85%.
Forsíðumynd: Ásdís tekur fyrstu skóflustungana að götunni Hæðarhvarfi, en hún naut aðstoðar Árna Geirs Eyþórssonar, framkvæmdastjóra Jarðvals
