Haldið verður upp á 17. júní með glæsibrag í Kópavogi og er boðið upp á dagskrá á nokkrum stöðum í bænum.
Hátíðarhöldin bera svip af 80 ára afmæli lýðveldisins, Söngsveitin Fílharmónía syngur ættjarðarlög í anddyri Salarins frá 13.00 til 13.30 og flytur lag Atla Ingólfssonar við ljóð Þórarins Eldjárns, Ávarp fjallkonunnar, sem samið var í tilefni afmælisins. Þar verður hægt að nálgast bókina Fjallkonan „Þú ert móðir vor kær,“ sem forsætisráðuneytið gefur út í ritstjórn Silju Aðalsteinsdóttur. Þá verður boðið upp á fullveldisköku á öllum hátíðarsvæðum.
Hefðbundin hátíðarhöld hefjast svo með skrúðgöngu frá MK klukkan 13.30 en henni lýkur á Rútstúni.
Þar tekur við skemmtidagskrá sem stendur yfir frá 14.00 til 16.00. Á sama tíma er skemmtidagskrá við íþróttahúsið Versali.
Fram koma meðal annars leikhópurinn Lotta, Gunnar Helgason og Valgerður Guðnadóttir, Idol stjörnur, Jóhanna Guðrún, Aron Can og VÆB.
Kynnar eru á Rútstúni: Eva Ruza og Hjálmar Örn en við Versali: Saga Garðars og Snorri Helga.
Auk þess verður skemmtidagskrá við Menningarhúsin í Kópavogi þar sem fram koma Söngsveitin Fílharmónía, BMX Brós, Skapandi sumarstörf og fleiri.
Í undirgöngunum við Hamraborg verður Graffiti-djamm frá 12.00-16.00.
Loks má þess geta að Hoppukastalar og leiktæki eru opin á Rútstúni og við Versali frá 12.00 og eru opin til 17.00.