Eva Sif nýr leikskólastjóri á Furugrund

Eva Sif Jóhannsdóttir hefur verið ráðin sem leikskólastjóri á leikskólanum Furugrund. Leikskólinn er fjögurra deilda og er nafn hans dregið af þeirri götu sem hann stendur við. Furugrund er rekinn af Kópavogsbæ og tók til starfa 8. apríl 1978. Í leikskólanum dvelja 70 börn á aldrinum 1-5 ára en nú í haust mun leikskólinn stækka og verða 6 deilda með 100 börn. Leikskólinn er staðsettur við Fossvogsdal og er stutt í skemmtileg útivistarsvæði. Í leikskólanum er lögð áhersla á að rækta með börnunum sjálfstæði og sjálfsaga og einkunnarorð leikskólans eru ; virðing, hlýja, öryggi og traust.

Eva Sif Jóhannsdóttir hefur starfað við leikskóla frá árinu 2002. Hún starfaði við leikskólann Marbakka í Kópavogi á árunum 2002-2008 sem leiðbeinandi með stuðning. Þá hafði hún umsjón með sérkennslu við sama leikskóla á árunum 2008-2012. Á árunum 2012-2021 starfaði hún við leikskólann Furugrund. Fyrst hafði hún umsjón með sérkennslu, þá var hún sérkennslustjóri og á árunum 2020-2021 var hún leikskólastjóri í afleysingu. Frá árinu 2021 hefur hún verið aðstoðarleikskólastjóri við leikskólann Núp og frá janúar–maí 2022 var hún í afleysingu sem sérkennsluráðgjafi á menntasviði Kópavogs.

Eva Sif lauk meistaragráðu í sérkennslufræðum frá menntavísindasviði Háskóla Íslands árið 2016. Hún hefur mikinn metnað fyrir starfinu, öfluga faglega sýn og leggur áherslur á mikilvægi góðra samskipta og samvinnu við nemendur, foreldra og samstarfsfólk. Reynsla hennar af stjórnun og faglegri forystu í leikskólastarfi ásamt jákvæðri og lausnamiðaðari nálgun mun nýtast henni við að gera góðan leikskóla enn betri. Eva Sif þekkir Furugrund mjög vel og hugmyndafræði leikskólans og hefur skýra framtíðarsýn um starf hans.

Nýjustu greinarnar

Tengdar greinar