Þann 1. febrúar mun Kópavogsbær auglýsa fyrstu sumarstörfin fyrir sumarið 2023. Síðasta sumar voru um 500 einstaklingar sem komu til starfa hjá bænum og má reikna með álíka fjölda í ár. Störfin eru fyrir öll þau sem fædd eru árið 2005 eða fyrr og sérstök áhersla lögð á að einstaklingar í námi fái vinnu.
Auglýsingar koma til með að birtast á Alfreð og heimasíðu Kópavogsbæjar á tímabilinu 1. febrúar til 31. mars. Um er að ræða í kringum 60 ólík störf og má þar nefna störf í leikskólum, vinnuskóla, sundlaugum og þjónustustörf í sumarafleysingum.
Þau sem ætla að sækja um störfin eru hvött til að vera á tánum þar sem ekki verður tekið við umsóknum eftir að umsóknarfresti lýkur. Hægt verður að skrá sig á biðlista sumarstarfa, þar sem stofnanir geta ráðið starfsfólk verði einhverjar breytingar á mönnun fyrir sumarið.