Breiðablik, Gerplu og HK lögðu fram beiðni á síðasta fundi bæjarráðs um stuðning Kópavogsbæjar við Kópavogsblótið 2025, sem verður haldið 24.janúar í Kórnum.
Kópavogsblótið hefur menningarlegt gildi fyrir sveitarfélagið og samfélagið í heild
Í bréfi sem fylgdi beiðninni frá félögunum segir m.a. að stóru íþróttafélögin í Kópavogi hafi staðið að sameiginlegu Kópavogsblóti síðastliðin 6 ár. Félögin leggja gríðarlega mikinn metnað í blótið og hefur þessi viðburður nú þegar fest sig rækilega í sessi í hjá íbúum Kópavogs. ,,Við teljum hann að sama skapi hafa mikið menningarlegt gildi fyrir sveitarfélagið og samfélagið í heild. Mikil eftirvænting er fyrir blótinu og ávallt hefur framkvæmdin gengið mjög vel og blótið fengið jákvæða og góða umfjöllun ár hvert. Félögin leggja til mikla vinnu við að láta Kópavogsblótið verða jafn glæsilegt og raun ber vitni á sem hagkvæmastan hátt en á sama tíma skiptir þetta sköpum í fjáröflun félaganna. Vegna mikilla verðhækkana hefur ágóðinn minnkað undanfarin ár og minna er til skiptanna.
Til þess að blótið verði að veruleika 2025 er gríðarlega mikilvægt að Kópavogsbær komi enn betur að þessum viðburði með stuðningi við félögin til að tryggja að Kópavogsblótið verði að veruleika á bóndadaginn 2025. Við óskum því eftir stuðningi Kópavogsbæjar sem væri fólginn í eftirfarandi þáttum:
- Afnot af íþróttamannvirkinu Kórnum
- Afnot og flutning hlífðargólfs
- Afnot og flutning dansgólfs
Með von um jákvæðar undirtektir og skjót svör,“ segir í bréfinu sem er undirritað af framkvæmdasjórum félaganna.
Bæjarráð samþykkti á fundinum að mannvirki Kópavogsbæjar ásamt hlífðargólfi í eigu bæjarins verði lánuð endurgjaldslaust vegna Kópavogsblótsins. Flutningur er á kostnað félaganna. Áætlað virði styrks bæjarins samsvarar kr. 17.338.192,-
Forsíðumynd: Það var mikið stuð á Kópavogsblótinu í fyrra og uppselt var að vanda
