Opnað var fyrir kosningu í Okkar Kópavogi sl. miðvikudag og stendur kosningin til hádegis 9.febrúar. Þetta í fjórða sinn sem íbúar í Kópavogi geta valið á milli nýrra verkefna
og forgangsraðað verkefnum innan sveitarfélagsins. Í þetta sinn eru 94 hugmyndir í kosningu, 14-20 í hverju hverfi. Kosningin er rafræn.
Kosningaaldur í Okkar Kópavogi hefur verið lækkaður um tvö ár og geta nú allir þeir sem verða fjórtán ára á árinu tekið þátt í atkvæðagreiðslu, svo framarlega sem þeir eru með rafræn skilríki. Alls eru ríflega 32 þúsund manns með kosningarétt í kosningunum.
Hugmyndir sem um er að velja eru af mjög fjölbreyttum toga, og er kostnaður við þau frá einni til 25 milljónir. Kópavogi er skipt í fimm hverfi aðalskipulags í verkefninu, Kársnes, Digranes, Smárann, Fífuhvamm (Lindir og Salir) og Vatnsenda og hefur hverfunum verið ráðstafað fé í hlutfalli við fjölda íbúa en alls verður 200 milljónum varið til framkvæmda verkefnanna árin 2022-2023.
Metþátttaka 2021
„Metþátttaka var í hugmyndasöfnun síðastliðið haust og geta íbúar valið milli mjög flottra verkefna í kosningunum sem við vonum að sem flestir, fjórtán ára og eldri, taki þátt í,“ segir Sigrún María Kristinsdóttir verkefnastjóri íbúatengsla hjá Kópavogsbæ.
Flest verkefnin sem nú eru í kosningu snúa að útivistarsvæðum bæjarins, leik- og grunnskólalóðum. Meðal þess sem íbúar hafa valið til þessa eru leiktæki, trjágróður, bekkir og öryggismyndavélar.
