Við rukkun fasteignagjalda Garðabæjar komu í ljós villur þar sem ekki var hægt að rukka fasteignagjöld í gegnum kreditkort hjá nokkrum íbúum.
,,Villuna má rekja til þess að um helgina innleiddu færsluhirðar um heim allan svokallaða ISO staðlabreytingu á því hvernig gengi íslensku krónunnar er skráð. Breytingin felur í sér að hætt var að nota tvo aukastafi við útreikning gengisins en þetta hefur haft talsverð áhrif hjá íslenskum kortafyrirtækjum og viðskiptavinum.
Búast má við að einhver bið verði á innheimtunni þar sem bíða þarf úrlausnar frá kortafyrirtækjum og er fólk beðið um að hafa samband við sinn viðskiptabanka til að fá frekari upplýsingar. Garðabær minnir á að hægt er að sjá alla greiðsluseðla undir rafræn skjöl í heimabanka og heildarútreikning fasteignagjalda má nálgast á mínum síðum hjá Ísland.is,“ segir á heimasíðu Garðabæjar.
