Það eru þrjár sýningar í Hönnunarsafni Íslands í tengslum við HönnunarMars 2025. Sýningarnar opnuðu þriðjudaginn 1. apríl kl. 18:00.
Vöruhönnuðurinn Þórunn Árnadóttir hefur verið í vinnustofudvöl í safninu undanfarnar vikur. Hún sýnir ferli og frumgerðir af nýrri tegund ilmgjafa sem sameinar virkni og form innblásin af pappírsbrotum. Þórunn hefur meðal annars hannað vörur fyrir Walt Disney, Tim Burton og Mörthu Stewart.
Myndlistarmaðurinn Unndór Egill Jónsson sýnir lampa úr íslensku birki þar sem náttúrulegum og geómetrískum formum er teflt saman. Hugmyndafræðin á bak við verkin snýst um að blanda saman þessum andstæðu formum á þann hátt að þau styðji hvort annað og gefi tilfinningu fyrir einingu. Handverkið leikur lykilhlutverk í að samruninn heppnist og til að undirstrika það hefur Unndór sett verkstæði sitt upp á safninu.
Brynjar Sigurðarson, vöruhönnuður sýnir lágmyndir sem hann kallar Skáldað landslag. Hann hefur áður hannað postulínsvasa fyrir Galerie Kreo í París með sömu aðferð sem byggir á að nota forrit sem alla jafnan eru notuð til að skapa karaktera í tölvuleikjum.
Frítt er inn á safnið á meðan á HönnunarMars stendur 1 – 6 apríl.
Hönnunarsafn Íslands, Garðatorgi, opið alla daga frá 12-17 nema mánudaga
Forsíðumynd: Þóra, Ingibjörg, Sunna og Ólöf.
