Marsmánuður byrjaði með fjöri í Tónlistarskóla Garðabæjar þegar nemendum á grunn-og miðstigi var boðið á tónleika.
Jazzbadass nefnist dagskráin sem krakkar í 6. og 7. bekk fengu að njóta en frábærir tónlistarmenn fóru yfir sögu jazztónlistar í tali og tónum og í lok tónleikanna fengu nemendur að spreyta sig á spurningakeppni um jazztónlist. Það voru söngkonan Margrét Eir, Sunna Gunnlaugs á píanó, Scott Mclemore á trommur og Leifur Gunnarsson á kontrabassa sem töfruðu fram þessa metnaðarfullu dagskrá.
Fiðurfé og fleiri furðuveru er hinsvegar heitið á dagskrá sem flutt var fyrir 2. og 3. bekk en óperusöngvararnir Hallveig Rúnarsdóttir og Jón Svavar Jósefsson ásamt Hrönn Þráinsdóttur píanóleikara fluttu lög eftir íslensk tónskáld svo sem Gunnstein Ólafsson og Tryggva M. Baldvinsson við ljóð Þórarins Eldjárns og fleiri. Óhætt er að segja að nemendur hafi skemmt sér konunglega og þótti raddtækni söngvarana með ólíkindum flott svo heyra mátti söngæfingar nemenda óma á götum er þau héldu aftur í skólann að loknum tónleikum. „Það er yndislegt að taka á móti mörghundruð börnum sem eru að upplifa eitthvað sérstakt, eitthvað sem þau ekki endilega upplifa annars. Lykilatriðið er að fá frábæra tónlistarmenn til að koma fram enda skipta gæðin í dagskrá fyrir börn öllu máli,“ segir Ólöf Breiðfjörð menningarfulltrúi sem heldur utan um dagskrá fyrir skólahópa.
Myndir: Jazzbadass á sviði með Margréti Eir. Hallveig Rúnarsdóttir og Jón Svavar sem gæða tónlistina enn meira lífi með líflegri sviðsframkomu.