Garðabær hefur gengið frá samningum við Íslenska gámafélagið og Terra umhverfisþjónustu um sorphirðu og djúpgáma.
Samningarnir við Íslenska gámafélagið eru annars vegar fyrir sorphirðu á lífrænu og almennu sorpi og hins vegar fyrir hirðingu á pappír og plasti. Almar Guðmundsson og Jón Þórir Frantzson forstjóri Íslenska gámafélagsins undirrituðu samninginn. Gildistíminn er í fimm ár með framlengingarákvæði um eitt ár í þrjú skipti.
Þá var undirritaður samningur vegna sorphirðu djúpgáma við Terra umhverfisþjónustu og undirrituðu þá Almar og Valgeir S. Baldursson fyrir hönd Terra. Gildistími þess samnings er tvö ár með framlengingarákvæði um eitt ár í senn í þrjú skipti. Djúpgámar eru7 stærri og hagkvæmari en hefðbundnar söfnunartunnur þar sem stærsti hluti gámsins er neðanjarðar. Einungis efsti hluti gámsins, innmötunin er sýnilegur. Í Garðabæ er slíka gáma að finna við Eskiás og í Lambamýri.
Samningarnir byggja á sameiginlegu útboði Garðabæja og Mosfellsbæjar og upphæðir samninganna við Íslenska gámafélagið ehf. námu um 80% af kostnaðaráætlun og samningurinn við Terra tæplega 70%.
Forsíðumynd: Almar Guðmundsson bæjarstjóri í Garðabæ, ásamt Valgeiri Baldurssyni forstjóra Terru og Regínu Ásvaldsdóttur, bæjarstjóra í Mosfellsbæ.
