Skapandi viðgerðarsmiðjur verða frá föstudegi til sunnudags frá kl. 12-18 í Hönnunarsafni Íslands.
Ýr Jóhannsdóttir er textílhönnuður og listakona sem starfar undir nafninu Ýrúrarí. Verk hennar eru að mestu unnin í prjóni og í þeim mætast húmor, handverk og hreyfing. Ýr hefur miðlað aðferðarfræði sinni í smiðjum þar sem unnið er með ósöluhæfar peysur úr fatasöfnun Rauðakrossins og þær fá nýtt líf.Ýr stundaði nám í textílhönnun við Myndlistarskólann í Reykjavík og lauk BA gráðu í faginu frá Glasgow School of Art árið 2017 og stundar nú nám í listkennsludeild LHÍ. „Peysa með öllu fyrir alla“ er hluti af lokaverkefni Ýrar.
Undanfarna fjóra mánuði hefur Ýr verið í vinnustofudvöl í Hönnunarsafni Íslands. Þar hefur hún haldið áfram með verkefnið „Peysa með öllu“ sem kynnt var á HönnunarMars 2020. Þá hóf hún samstarfi við fatasöfnun Rauða Krossins með peysur sem lent höfðu í óhöppum í fyrra lífi og voru því ekki boðlegar til sölu í verslunum Rauða Krossins.
Fólki hefur verið boðið að taka að sér peysu frá Rauða Krossinum og taka þátt í smiðjum í skapandi fataviðgerðum. Uppskera þessarar vinnu verðu til sýnis á HönnunarMars ásamt þeim peysum sem Ýr sjálf hefur umbreytt á tímabilinu.í tengslum við uppskeruhátíðina verður boðið upp á skapandi viðgerðarsmiðjur frá föstudegi til sunnudags frá kl. 12-18 í Hönnunarsafni Íslands.
Mynd: Ýrúrarí í vinnustofudvöl