Í Garðabæ hefur börnum á leikskólaaldri fjölgað með stækkandi bæjarfélagi og stórum árgangi sem er að hefja leikskólagöngu sína í haust.
Vegna þessarar fjölgunar leikskólabarna í bænum er stefnt að því að opna nýjan leikskóla í Garðabæ í haust. Nýi leikskólinn hefur fengið heitið Mánahvoll og verður staðsettur á Vífilsstöðum, við hliðina á leik-skólanum Sunnuhvoli sem er þar fyrir. Leikskólabyggingin verður samsett úr einingahúsum sem flutt verða á staðinn.
Ungbarnaleikskóli fyrir 12-24 mánaða gömul börn
Mánahvoll verður 6 deilda ungbarnaleikskóli fyrir börn á aldrinum 12-24 mánaða. Kristín Sigurðardóttir hefur verið ráðin sem leikskólastjóri Mánahvols en hún hefur undanfarin tvö ár starfað sem aðstoðarleikskólastjóri á leikskólanum Ökrum í Garðabæ. Nú þegar er byrjað að auglýsa eftir leikskólakennurum við Mánahvol.
Leikskólinn Mánahvoll tekur til starfa í ágúst með einni deild til að byrja með og svo bætast við fleiri deildir um haustið. Fyrstu vikurnar hefst starfsemi skólans í húsnæði leikskólans Krakkakots á Álftanesi þar til búið verður að setja upp og útbúa hús Mánahvols á Vífilsstöðum. Gert er ráð fyrir að það verði í byrjun október sem starfsemin flyst yfir á Vífilsstaði.
Öll börn sem eru 12 mánaða í ágúst hafa fengið boð um leikskólapláss
Garðabær hefur lagt metnað í að bjóða börnum niður í 12 mánaða aldur kost á leikskóladvöl þegar skólaár hefst 1. september ár hvert. Nú þegar er búið að bjóða öllum börnum sem eru fædd í ágúst 2020 og eldri pláss í leikskólum í bænum. Fyrirhugað er að bjóða börnum fæddum frá september 2020 pláss á leikskólanum Mánahvoli með haustinu þegar skólinn verður tekinn til starfa.
Á næsta ári fjölgar leikskólum enn í bænum þegar nýr leikskóli rís í Urriðaholti. Byggingarframkvæmdir við þann leikskóla eru í undirbúningi.
Mynd: Framkvæmdir standa nú yfir við nýjan leikskóla á Vífilsstöðum
