Bókasafn Garðabæjar býður öll börn og foreldra þeirra velkomin á bókasafnið í sumar. Á Bókasafni Garðabæjar á Garðatorgi 7 verður skipulögð dagskrá með reyndu starfsfólki alla þriðjudaga, miðvikudaga og fimmtudaga. Einnig verður okkar sívinsæli sumarlestur í gangi í allt sumar og mun einn heppinn lestarhestur fá glaðning í hverri viku.
Hvað er í boði?
Þriðjudagar:
Þriðjudagsleikar frá kl. 13-15: Stuð og stemmning í útileikjum á Garðatorgi. Boðið verður uppá útikeilu, teygjó, krítar, snú-snú og margt fleira.
Leshringurinn Lesum saman frá kl. 14-15, er ætlaður fyrir krakka á aldrinum 6-12 ára þar sem þau taka með sér eldri lesfélaga. Áhersla verður á lesskilning, jákvæða umræðu og samveru fyrir þátttakendur. Þegar þátttakendur hafa lesið eina bók saman er hægt að fylla út happamiða sem fer í lukkupott.
Miðvikudagar:
Myrkraverk á bókasafninu frá kl. 9-12. Við dimmum ljósin og bjóðum uppá ljósaborð og segulkubba, skuggalega skemmtilegt.
Tæknifikt inni í Sköpunarskúffunni frá kl. 13-14, þar er að finna þrívíddarprentara og vínilskera, frumlegt og skapandi.
Fimmtudagar:
Fimmtudagsföndursmiðja frá kl. 10-12. Alltaf eitthvað nýtt og spennandi á hverjum fimmtudegi fyrir föndurþyrst börn á öllum aldri.
Harry Potter hátíð:
Afmælisdagur Harry Potter er 31. júlí. Við tökum afmælisveislur mjög alvarlega á Bókasafni Garðabæjar og afmæli Harry Potter er enginn undantekning. Við munum útbúa töfrasprota, leita að gullnu eldingunni, skemmta okkur með sokka og margt fleira. Dagskráin verður auglýst síðar.
Sumardagskrá Bókasafns Garðabæjar lýkur ekki fyrr en 15. ágúst. Við hlökkum til að taka á móti hressum lestarhestum og öðrum stuðboltum í allt sumar.