Jónsmessugleði Grósku haldin með gjörbreyttu sniði og efnt til stórsýningar

Jónsmessugleði Grósku verður haldin í fjórtánda sinn laugardaginn 22. júní kl. 14-18. Að þessu sinni er hún með gjörbreyttu sniði því efnt verður til stórsýningar í Gróskusalnum og á Garðatorgi með fjölbreytilegum listaverkum eftir um 80 listamenn.

Jónsmessugleði er haldin að frumkvæði Grósku í samstarfi við Garðabæ og mun Almar Guðmundsson bæjarstjóri setja gleðina. Sýnendur eru myndlistarmenn í Grósku og gestalistamenn hvaðanæva af landinu.

Unnið er í ýmsum miðlum og sýningin teygir anga sína víða. Hún nær alla leið niður í undirgöngin við Aktu Taktu þar sem Lomek og félagar hafa málað skemmtilegt graffiti verk sem vonandi fær að lífga upp á göngin til framtíðar.

Jafnframt verða listamenn með opnar vinnustofur við Garðatorg, Artsupplies verslun býður upp á kynningu og vörur til sölu og fyrirtæki og verslanir við Garðatorg brydda upp á ýmsu óvæntu í tilefni opnunardagsins. Auk myndlistarveislunnar verða margvíslegir listviðburðir á dagskrá: Tónlist, söngur, dans, leiklist, gjörningar og fleira. Ýmsir listamenn koma fram og meðal þeirra eru ungmenni úr skapandi sumarstörfum Garðabæjar.

Undirbúningur fyrir Jónsmessugleðina er í fullum gangi

Jónsmessugleði stendur til og með 29. júní

Jónsmessugleði stendur til og með 29. júní og á meðan fylla listaverkin Gróskusalinn og Garðatorg. Sýningin í Gróskusalnum verður áfram opin klukkan 14-18 en sýning- in á torginu klukkan 8-19. Jafnframt er Auja (Auður Björnsdóttir) með sýninguna Happy Houses á Bókasafni Garðabæjar til júníloka sem einnig er opin klukkan 8-19.

Óhætt er að segja að Garðatorg iði af list og lífi þessa daga og fleiri viðburðir verða á dagskrá. Mánudaginn 24. júní klukkan 20-21.30 býður séra Friðrik Hjartar upp á fræðslugöngu með listrænu ívafi um miðbæ Garðabæjar og miðvikudaginn 26. júní klukkan 19-20.30 verður Anna C. Leplar með teiknismiðju á Garðatorgi.

Allir eru velkomnir á Jónsmessugleði Grósku og fólk er hvatt til að fjölmenna.

Fyrsta Jónsmessugleði var haldin í Garðabæ fyrir fimmtán árum og var Gróska, félag myndlistarmanna í Garðabæ, stofnað í framhaldi af því. Gróska er öflugt myndlistarfélag sem hefur fest sig í sessi í menningarlífi Garðabæjar með sýningum og öðrum menningarviðburðum.

Fylgist með á Facebook síðu Grósku:

https://www.facebook.com/groska210/

https://www.instagram.com/groskamyndlist/

Nýjustu greinarnar

Tengdar greinar