Hrafnhildur Sigurðardóttir, kennari við Sjálandsskóla, hlaut viðurkenningu þegar Íslensku menntaverðlaunin fyrir árið 2024 voru veitt við hátíðlega athöfn á Bessastöðum í gær.
Íslensku menntaverðlaunin voru veitt í fimm flokkum en Hrafnhildur hlaut viðurkenningu í flokknum framúrskarandi kennsla. Verðlaunin hlýtur hún fyrir fjölbreytta og hugmyndaríka útikennslu, þróun fjölbreyttra valgreina og leiðsögn fyrir kennara og kennaraefni um útivist og umhverfismennt.
Halla Tómasdóttir, forseti Íslands, afhenti þremur menntastofnunum og þremur grunnskólakennurum verðlaunin í ár. Markmið verðlaunanna er vekja athygli á því metnaðarfulla og vandaða starf sem unnið er með börnum og ungmennum á öllum skólastigum í landinu.
Ólafur Ragnar Grímsson stofnaði til Íslensku menntaverðlaunanna og veitti þau á árunum 2005–2011, þegar þau lögðust af í kjölfar efnahagshrunsins. Verðlaunin voru tekin upp að nýju árið 2020 og eru nú veitt árlega á Bessastöðum.
Myndir: Mummi Lú/forseti.is
