Íslensku menntaverðlaunin voru veitt við hátíðlega athöfn á Bessastöðum. Verðlaunað var í fimm flokkum og er verðlaununum ætlað að vekja athygli á því góða starfi sem stundað er í skólum og á frístundasviði.
Verðlaun fyrir framúrskarandi kennslu hlaut Hrafnhildur Sigurðardóttir, kennari við Sjálandsskóla í Garðabæ, fyrir fjölbreytta og hugmyndaríka útikennslu, þróun fjölbreyttra valgreina og leiðsögn við kennara og kennaraefni um útivist og umhverfismennt.
Í umsögn segir meðal annars:
,,Hrafnhildur gerir hverja kennslustund að ævintýri, hvort sem um er að ræða hefðbundin verkefni eða í fjörunni, á kajak, í fjallgöngu eða í útieldun. Ósjaldan má sjá nemendur Sjálandsskóla setja upp tjöld í nágrenninu, hjóla upp í Heiðmörk eða skoða lífríkið í flæðamálinu.
Nemendur sem af einhverjum ástæðum hafa átt erfitt uppdráttar í skólanum hafa notið aðstoðar Hrafnhildar. Hún hefur einstakt lag á því að nálgast nemendur, styrkja þá félagslega og bæta líðan.“
Forsíðumynd: Hrafnhildur ásamt Höllu Tómasdóttur forseta Íslands sem veitti henni verðlaunin á Bessastöðum.
