Hinn klassíski leshringur gæddi sér á huggulegum veitingum

Leshringur Bókasafns Garðabæjar, hinn klassíski, stóð fyrir öflugu starfi í vetur, en meðlimir hittast tvisvar í mánuði og ræða saman um bókmenntir. Leshringurinn var stofnaður árið 2000 og hefur Rósa Þóra Magnúsdóttir verið umsjónarmaður frá árinu 2003. Margir meðlimir hafa sótt fundi árum saman og einn óslitið í 18 ár en það er hún Kolbrún Haraldsdóttir.

Á haustönn voru lesin verk Hallgríms Helgasonar og nokkrar vel valdar erlendar skáldsögur eftir höfunda, sem flestir hafa heimsótt Bókmenntahátíðina í Reykjavík en á vorönn var þemað séra Jakob Jónsson og rithöfundafjölskyldan mikla, ástandið, eftirstríðsárin, ferðalýsingar og ævisögur.

Vetrarstarfinu lauk um miðjan apríl og gerðu meðlimir sér þá glaðan dag og áttu notalega samverustund á safninu. Huggulegar veitingar voru í boði, lesin voru ljóð, sagðar sögur og spjallað á léttum nótum. Leshringurinn hefur aftur störf að nýju 26.september og eru nýir meðlimir hjartanlega velkomnir.

Nýjustu greinarnar

Tengdar greinar