Fjölmennt var og góð stemmning á Jónsmessugleði Grósku, sem haldin var í fjórtánda sinn sl. laugardag, en það var Almar Guðmundsson bæjarstjóri í Garðabæ sem setti gleðina.
Að þessu sinni var Jónsmessugleðin með gjörbreyttu sniði því efnt var til stórsýningar í Gróskusalnum og á Garðatorgi með fjölbreytilegum listaverkum eftir um 80 listamenn sem eru í Gróska, en einnig tóku gestalistamenn hvaðanæva af landinu þátt að þessu sinni.
Unnið var í ýmsum miðlum og sýningin teygir anga sína víða. Hún nær alla leið niður í undirgöngin við Aktu Taktu þar sem Lomek og félagar hafa málað skemmtilegt graffiti verk sem vonandi fær að lífga upp á göngin til framtíðar.
Jafnframt voru listamenn með opnar vinnustofur við Garðatorg, Artsupplies verslun bauð upp á kynningu og vörur til sölu og fyrirtæki og verslanir við Garðatorg brydduðu upp á ýmsu óvæntu í tilefni opnunardagsins.
Auk myndlistarveislunnar voru margvíslegir listviðburðir á dagskrá: Tónlist, söngur, dans, leiklist, gjörningar og fleira. Ýmsir listamenn komu fram og meðal þeirra voru ungmenni úr Skapandi sumarstörfum Garðabæjar.
Ekki örvænta – stórsýning Grósku stendur til og með 6. júlí
Þeir sem komust ekki á Jónsmessugleðina þurfa ekki að örvænta því gleðin stendur til og með 6. júlí og á meðan fylla listaverkin Gróskusalinn og Garðatorg. Sýningin í Gróskusalnum verður áfram opin klukkan 14-18 en sýningin á torginu klukkan 8-19. Jafnframt er Auja (Auður Björnsdóttir) með sýninguna Happy Houses á Bókasafni Garðabæjar til júníloka sem einnig er opin klukkan 8-19.
Allir eru velkomnir á Jónsmessugleði Grósku á Garðatorgi og fólk er hvatt til að koma við.
Fyrsta Jónsmessugleði var haldin í Garðabæ fyrir fimmtán árum og var Gróska, félag myndlistarmanna í Garðabæ, stofnað í framhaldi af því. Gróska er öflugt myndlistarfélag sem hefur fest sig í sessi í menningarlífi Garðabæjar með sýningum og öðrum menningarviðburðum.
Fylgist með á Facebook síðu Grósku: https://www.facebook.com/groska210/https://www.instagram.com/groskamyndlist/
