Garðahraun er sértækt frístunda- og félagsmiðstöðvaúrræði í Garðabæ fyrir börn í 5.–10. bekk, sem umbreytist í Sumarhraun yfir sumarmánuðina. Þar býðst börnum með sérþarfir í 1.–7. bekk að taka þátt í fjölbreyttu og aðgengilegu sumarstarfi. Verkefnastjóri Garðahrauns og Sumarhrauns, Ágúst Arnar Þráinsson, segir markmiðið í starfinu einfalt og skýrt: „Þetta verður að vera skemmtilegt og öllum á að líða vel.“
Stundum er bara nóg að lesa Andrésblað og slaka á, spjalla við vini og hafa það notalegt
Í Sumarhrauni er lögð sérstök áhersla á að gera sumarið að notalegri og uppbyggilegri upplifun fyrir börnin. Þar er dagskráin mótuð út frá áhugasviði og þörfum hvers og eins, og börnin fá að hafa áhrif á hvernig þeirra dagur lítur út. „Stundum er bara nóg að lesa Andrésblað og slaka á, spjalla við vini og hafa það notalegt,“ segir Ágúst.
Viðburðir, útivist og tenging við náttúruna eru stór hluti af starfseminni. „Við reynum að nýta náttúruna hér á Álftanesi sem og fjölbreytta afþreyingu á höfuðborgarsvæðinu. Fjölskyldu- og húsdýragarðurinn er t.d. mjög vinsæll en við förum líka í bæjarferðir og könnum nýja staði.“
Umsóknarfrestur í Sumarhraun er til og með 7. maí og eru foreldrar hvattir til að sækja um í tæka tíð. Áhugasamir geta einnig fengið nánari kynningu á starfinu eða óskað eftir heimsókn í Garðahraun.
Um Garðahraun
Garðahraun er opið eftir skóla til kl. 16:30 og býður upp á skapandi, öruggt og fjölbreytt tómstundastarf fyrir börn og unglinga í Garðabæ. Lögð er áhersla á virðingu, jákvæð samskipti, fagleg vinnubrögð og gott foreldrasamstarf. Boðið er upp á síðdegishressingu og hægt er að velja að mæta einu sinni í viku eða oftar.
Staðsetning: Hátíðarsalur við UMFÁ, Breiðumýri 225, Álftanes.
Forstöðumaður: Ágúst Arnar Þráinsson – [email protected] – Sími: 820-8594
