Á fundi bæjarráðs sl. þriðjudag voru tilboð opnuð í bygginarétt lóða á Hnoðraholti, en alls bárust 299 tilboð í 10 fjölbýlishúsalóðir, 6 par-/raðhusalóðir og 7 einbýlishúsalóðir. Þegar hæstu tilboðin í hverja lóð eru tekin saman þá hljóða þau upp á samtals 2,529.350.000 milljónir kr.
Stéttarfélagið ehf fór mikinn í útboðinu og átti hæsta tilboðið í allar fjölbýlishúsalóðirnar og 5 af 6 par-/raðhúsalóðum að upphæð 2,181,750.000 kr.
Nú hefur bærinn farið betur yfir tilboðin, skráð og flokkað og verða þau tekin til afgreiðslu á fundi bæjarráðs sem hófst klukkan 08:00 í morgun.
Tilboðsgjafi bundinn af tilboðum sínum
Samkvæmt reglum um úthlutunina þá er tilboðsgjafi bundinn af tilboðinu sínu eins og fram kom í auglýsingunni þegar lóðirnar voru auglýstar. Viðkomandi tilboðsgjöfum, sem eiga tilboð sem samþykkt verða, verður tilkynnt með skriflegum hætti um úthlutun lóðar og sendur reikningur fyrir greiðslu á kaupverði byggingarréttar í samræmi við skilmála þessa.
Verði reikningur ekki greiddur á eindaga er Garðabæ heimilt að rifta kaupunum.
En það ætti að koma í ljós eftir fund bæjarráðs, sem stendur núna yfir, hver niðurstaðan verður.
Mynd. Guðjón Erling Friðriksson, bæjarritari Garðabæjar, fylgdist vel með þegar starfsfólk bæjarins opnaði tilboðsumslögin sl. þriðjudag.
