Miðstöð menntunar og skólaþjónustu gaf bókina Orð eru ævintýri út í fyrra og var öllum börnum á Íslandi fædd árin 2018, 2019 og 2020 færð bókin. Auk þess fengu allir leikskólar afhent eintök af henni.
Í ár fá börn fædd árið 2021 bókina að gjöf. Einnig mun hver og einn leikskóli fá glæný spil og samtalsspjöld afhent.
Bókin Orð eru ævintýri er litrík myndaorðabók sem inniheldur yfir 1000 algeng íslensk orð. Efnið er vel til þess fallið að spjalla um orð daglegs lífs við nemendur sem eru að stíga sín fyrstu skref í íslensku. Þannig er hægt að efla orðaforða þeirra og virkja ímyndunaraflið.
Spilin og samtalsspjöldin auka þá gildi verkefnisins Orð eru ævintýri enn frekar en þær viðbætur má, eins og bókina, nýta með börnum við eflingu málþroska.
Miðstöð menntunar og skólaþjónustu vann verkefnið Orð eru ævintýri í samvinnu við Miðju máls og læsis hjá skóla- og frístundasviði Reykjavíkurborgar, leikskólana Laugasól og Blásali, Austurbæjarskóla og námsbraut í talmeinafræði við Háskóla Íslands.