Almar Guðmundsson bæjarstjóri Garðabæjar mun í dag, fimmtudaginn 13. mars, bjóða íbúum upp á kaffi og spjall í Álftaneslaug. Almar verður á staðnum á milli klukkan 16:30 og 17:30. Öllum er þá velkomið að líta við og fá sér sæti með bæjarstjóra í stutta stund og eiga við hann samtal.
Hvetur fólk til að líta við hjá sér og fá sér kaffibolla
„Hugmyndin með skrifborðsflakkinu er að hitta á áhugasama íbúa og taka spjallið um það sem þeim liggur á hjarta, hvort sem það eru stór eða smá mál. Við höldum reglulega íbúafundi og þar myndast ávallt gott spjall, í fyrra prófuðum við svo að bjóða upp á opið samtal á víð og dreif um bæinn og það lukkaðist vel. Með þessu fyrirkomulagi fæ ég tækifæri til að tala við bæjarbúa á aðeins persónulegri nótum,“ segir Almar sem hvetur fólk til að líta við hjá sér og fá sér kaffibolla.
Í næstu viku, miðvikudaginn 19. mars, verður Almar í Ásgarðslaug frá klukkan 7:30 til 9:30. Flakkið heldur svo áfram á fleiri stöðum í bænum á næstu vikum.