Eitt af mikilvægum þáttum í uppeldi barna er að gefa þeim tækifæri til að láta um sig muna og hjálpa þeim að horfa útfyrir sig sjálf í þeim tilgangi að auka samkennd og samhug. Það er mikilvægt að þau fái að heyra og reyna að þau eru hendur Guðs í þessum heimi.
Börn í fermingarfræðslu kirkjunnar hafa undanfarin tuttugu og fimm ár lagt sitt af mörkum til Hjálparstarfs kirkjunnar með því að ganga í hús í sóknum um allt land með bauk hjálparstarfsins. Framlag fermingarbarna er afar mikilvægt en það safnast margar milljónir á hverju ári.
Þessi árlega söfnun fermingarbarnanna hefst á þriðjudaginn 5. nóvember og endar föstudaginn 8. nóvember, en þau munu skila baukunum í messu í Vídalínskirkju 10. nóvember. Safnað er til verkefna Hjálparstarfsins í Afríku.
Fermingarbörnin fá að kynnast í fermingarfræðslunni þróunarsamvinnu og hjálparstarfi á vegum Hjálparstarfs kirkjunnar. Þau fá innsýn í líf fólksins sem býr á verkefnasvæðum Hjálparstarfsins og rætt er við fermingarbörnin um sameiginlega ábyrgð á því að allir jarðarbúar fái lifað mannsæmandi lífi.
Börnunum er leiðbeint um framkomu, öryggi og að gleyma ekki að vera vel klædd, áður en söfnunin hefst. Fyrir þeim er brýnt að fara alltaf tvö og tvö saman og foreldrar/forráðamenn eru hvattir til að ganga með þeim. Tökum vel á móti fermingarbörnunum og hvetjum þau áfram.
Prestar og fermingarfræðarar Vídalínskirkju